Schumacher sáttur við endurkomuna í Formúlu 1 þrátt fyrir að sigra ekki

Michael Schumacher ákvað að mæta aftur í eldlínuna í Formúlu 1 á þessu ári, eftir þriggja ára hlé frá íþróttinni. Hann náði ekki að landa sigri á árinu með Mercedes liðinu, en segist engu að síður vera ánægður með ákvörðun sína í frétt á autosport.com.

Schumacher varð í níunda sæti í stigamótinu, 70 stigum á eftir liðsfélaga sínum Nico Rosberg, en landi þeirra frá Þýskalandi, Sebastian Vettel varð heimsmeistari.

"Ég naut þess og finnst ég hafa rétt til að gera það sem ég nýt", sagði Schumacher í frétt autosport.com sem vitnar í CNN um endurkomu sína í Formúlu 1. Sumir voru hissa á ákvörðun hans að mæta til leiks á ný, en aðrir fögnuðu henni. Schumacher hefur sjö sinnum orðið heimsmeistari í Formúlu 1.

"Hvort ég gerði eitthvað til að skaða ímynd mína... mér líður bara vel með ákvörðun mína og fæ svo mikinn stuðning frá fólki. Vissulega vill ég ná árangri. Ég er bara ánægður ef ég komst á sigurbraut með liðinu. Ég er að vinna að því marki. Í því liggur gleðin og ástríðan í Formúlu 1."

Schumacher kvaðst ekki hafa fagnað þeirri velgengni sem hann var að vonast eftir, en Mercedes liðið náði engum sigri á árinu. Mercedes liðið var byggt á grunni Brawn liðsins sem varð meistari árið áður. Schumacher sagðist ekki í vafa að árangur myndi nást með Mercedes í framtíðinni, enda legðu menn hart að sér.