Staða ríkissjóðs betri en spáð var

Staða ríkissjóðs fyrstu níu mánuði ársins var nítján milljörðum króna betri en áætlanir gerðu ráð fyrir, að því er fram kemur í nýjum tölum fjármálaráðuneytisins.

Handbært fé frá rekstri var neikvætt um tæpa 74 milljarða en í áætlunum var gert ráð fyrir að það yrði neikvætt um tæpa 93 milljarða. Á sama tímabili í fyrra var handbært fé frá rekstri neikvætt um tæpa 89 milljarða.

Handbært fé frá rekstri sýnir það fé sem regluleg starfsemi ríkisins skilar. Er það í raun mismunur á inn- og útgreiðslum ríkissjóðs.

Tekjur ríkissjóðs fyrstu níu mánuðina námu 336 milljörðum en gjöldin voru 392 milljarðar. Til viðbótar gjöldunum bætist staða rekstrartengdra eigna og skulda sem er neikvæð um rúma sautján milljarða.

Tekjurnar voru þrettán milljörðum króna meiri en áætlað var í fjárlögum og munar þar einkum um hagnað af svonefndu Avens-samkomulagi. Snýst það um kaup Seðlabankans á tilteknum eigum Landsbankans í Lúxemborg.

Tekjuskattur einstaklinga nam rúmum 64 milljörðum fyrstu níu mánuðina sem er aukning um fimm milljarða frá í fyrra. Tekjuskattur lögaðila dróst hins vegar saman um þrjá milljarða. Skattur á fjármagnstekjur dróst mikið saman á milli ára en breyting á innheimtu ræður þar miklu.- bþs