Guðjón tryggði Val Reykjavíkurmeistaratitilinn

Guðjón Pétur Lýðsson tryggði Val 1-0 sigur á KR í úrslitaleik Reykavíkurmótsins í Egilshöllinni í kvöld. Guðjón sem kom til Vals frá Haukum í vetur skoraði eina mark leiksins með stórglæsilegu skoti beint úr aukaspyrnu á 59. mínútu.

KR-ingar voru sterkari í fyrri hálfleiknum en náðu ekki að komast yfir. Valsmenn komu síðan sterkir í seinni hálfleikinn og spiluðu allt annan og betri bolta en fyrir hlé og náðu að skora sigurmarkið þegar hálftími var eftir.

Sigurmark Guðjóns var þrumuskot beint úr aukaspyrnu rétt fyrir utan teig sem fór upp í bláhornið óverjandi fyrir Hannes Þór Halldórsson í marki KR.

KR-ingar höfðu unnið Reykjavíkurmeistaratitilinn undanfarin tvö ár en Valsmenn sem voru verða Reykjavíkurmeistarar í tuttugusta sinn frá upphafi höfðu ekki unnið þennan titil í sex ár og aðeins einu sinni frá og með árinu 1988.

Kristján Guðmundsson byrjar því vel með Valsliðið sem hefur verið að spila flottan fótbolta undir hans stjórn á undirbúningstímabilinu.