Halldór: Eigum talsvert inni

„Við höfum sagt það áður að við ætlum okkur stóra hluti á þessu tímabili og við viljum fara lengra. Það er spurning hvort það takist í kvöld," segir Halldór Jóhann Sigfússon, fyrirliði Fram.

Fram mætir í kvöld FH í oddaleik liðanna í undanúrslitum úrslitakeppni N1-deildar karla. FH vann nokkuð sannfærandi sigur á heimavelli í fyrsta leik liðanna en Fram svaraði fyrir sig með sigri í spennandi leik um helgina.

„Ég á von á hverju sem er í kvöld," sagði Halldór Jóhann í samtali við Vísi. „Ég vonast fyrst og fremst eftir jöfnum og spennandi leik og vona að fólk muni fjölmenna á völlinn. Bæði lið ætla sér áfram sem er eðlilegt."

Hann segir að sínir menn hafi ekki alltaf náð að sýna sitt rétta andlit að undanförnu en að það skipti ekki máli þegar út í svona leik er komið.

„Við höfum verið nokkuð rokkandi. Við höfum unnið leiki mjög sannfærandi en svo dottið niður inn á milli eins og við gerðum í fyrri leiknum gegn FH í Kaplakrika. En ég tel að það skipti ekki máli í svona leik þar sem allt er undir. Það vilja allir vera í úrslitakeppninni og við erum að berjast fyrir lífi okkar eins og hin liðin."

„Við teljum að við eigum enn talsvert inni. Við náðum ekki að sýna okkar rétta andlit, hvorki í fyrri leiknum né í fyrri hálfleik í leiknum um helgina," sagði hann. „Við töluðum um það í hálfleik og ég held að við getum gert enn betur en við höfum sýnt í þessarri rimmu."

Halldór Jóhann að varnarleikur og markvarsla muni mestu máli skipta í kvöld, eins og svo oft áður. „Bæði lið geta spilað góða vörn og fengið þá góða markvörslu í leiðinni. Ég hef ekki miklar áhyggjur af sóknarleiknum okkar."

„Ég vonast eftir spennandi leik og að þetta ráðist á síðustu sekúndunum. Það er alltaf skemmtilegast fyrir leikmenn og áhorfendur."