Pálmi Rafn með tvö mörk og Veigar Páll með eitt í sigri Stabæk

Pálmi Rafn Pálmarson skoraði tvö mörk og Veigar Páll Gunnarsson var með eitt þegar Stabæk vann 4-2 útisigur á Start í norsku úrvalsdeildinni í fótbolta í dag. Stabæk fór upp í annað sæti deildarinnar með þessum sigri.

Start var 1-0 yfir í hálfleik en Pálmi Rafn jafnaði leikinn á fyrstu mínútu í seinni hálfleiknum og kom liðinu síðan í 3-1 á 61. mínútu eftir að Ollé Ollé hafði skorað annað mark Stabæk-liðsins í millitíðinni.

Start minnkaði muninn í 2-3 á 64. mínútu en Veigar Páll skoraði þá fjórða markið í næstu sókn eftir sendingu frá Bjarna Ólafi Eiríkssyni.

Veigar Páll hefur þar með skorað 7 mörk í fyrstu 9 umferðunum en öll þessi sjö mörk hans hafa komið í síðustu sex leikjum. Pálmi Rafn skoraði í öðrum leiknum í röð en hann tryggði Stabæk sigur á Odd Grenland í leiknum á undan.