Læknir Tiger Woods játar sök í lyfjahneykslismáli

Kanadíski læknirnir Anthony Galea hefur játað að hafa smyglað ólöglegum lyfjum til Bandaríkjanna. Galea sem starfar í Toronto í Kanada hefur haft íþróttamenn á borð við Tiger Woods og hafnarboltastjörnuna Alex Rodriguez á sínum snærum.

Játning Galea hefur það í för með sér að ekki verður réttað yfir lækninum. Hefðu réttarhöld farið fram er talið líklegt að ljóstrað hefði verið upp um alla íþróttamennina sem Galea hefur haft í sinni umsjá. Saknsóknari í Buffalo í Bandaríkjunum hefur þó gefið upp að meðal þeirra séu golfarar, atvinnumenn í hafnabolta og leikmenn í amerískum fótbolta.

Talið er að Galea hafi haft um 20 atvinnumenn á sínum snærum á árunum 2007-2009. Yfirvöld í Kanada og Bandaríkjunum hafa fylgst náið með Galea síðan í september 2009 þegar aðstoðarkona hans, Mary Anne Catalano, var gripinn á landamærunum í Buffalo með ólögleg lyf.

Talið er að Galea hljóti tveggja ára fangelsisdóm. BBC greindi frá.