Sjónvarps- og útvarpsmaðurinn Andri Freyr Viðarsson verður gestur útvarpsþáttarins Vasadiskó á X-inu FM977 á sunnudag. Þar mætir hann í liðinn "Selebb shuffle" þar sem þekktir einstaklingar mæta með mp3-spilarana sína, stinga í samband og setja á shuffle. Andri ber svo ábyrgð á því sem tækið hans spýtir út úr sér.
Andri hefur farið á kostum í sjónvarpsþáttunum Andri á flandri á RÚV núna í sumar en hann hóf feril sinn á X-inu fyrir all mörgum árum síðan. Morgunþættir hans á Rás2 hafa vakið mikla hrifningu - og þar á meðal einstaklega vel heppnað lagaval - en Andri er þekktur fyrir að grafa upp gleymda smelli og skvetta þeim á landsmenn.
Vasadiskóþátturinn verður með sérstöku sniði í þetta skiptið. Auk þess að fá Andra í heimsókn verður hann tileinkaður Mercury verðlaunum í ár en þau eru eftirsóttustu tónlistarverðlaun Breta. Tilkynnt var um tilnefningar þann 19. júlí síðastliðinn og óhætt er að fullyrða að þar séu margar gæða plötur á ferð. Allar plöturnar verða kynntar og leikin lög af þeim öllum.
Þátturinn er á dagskrá á sunnudaginn frá kl. 15. Einnig er hægt að hlusta á eldri þætti hér á Vísi.is.
Fylgist með Vasadiskó á Facebook.
Fram
Haukar
