Gummi Ben skoraði síðasta mark Íslands á móti Kýpur

Guðmundur Benediktsson var síðasti íslenski landsliðsmaðurinn sem náði því að skora í landsleik á móti Kýpur. Ísland og Kýpur mætast á Laugardalsvellinum í kvöld en Ísland er búið að spila 231 mínútu á móti Kýpur án þess að skora.

Síðustu tveir leikir Íslands við Kýpur hafa endað með markalausu jafntefli en Guðmundur Benediktsson skoraði seinna mark Íslands í 2-1 sigri í vináttulandsleik á Akranesi 5. júní 1996. Alexander Högnason skoraði fyrra markið með skalla eftir aukaspyrnu frá Ólafi H. Kristjánsson, núverandi þjálfara Breiðabliks.

Mark Guðmundar var með skalla eftir fyrirgjöf Þórðar Guðjónssonar og kom það á 39. mínútu. Síðan þá er íslenska liðið búið að spila í 231 mínútu á móti Kýpur án þess að skora. Kýpverjar hafa beðið aðeins skemur (215 mínútur) því þeir minnkuðu muninn í 2-1 á 55. mínútu leiksins á Akranesi fyrir rúmum fimmtán árum.