Umfjöllun: HK gerði nóg til þess að vinna Gróttu

HK vann sanngjarnan 25-22 sigur á Gróttu er liðin mættust í Digranesi í kvöld. HK með frumkvæðið allan tímann og sigurinn þægilegri en lokatölurnar segja til um.

HK komst í 5-1 strax í byrjun en þá skellti Lárus Ólafsson í lás í marki Gróttu. Þökk sé frábærri markvörslu hans náði Grótta að minnka muninn í tvö mörk fyrir hlé, 11-9.

Lárus náði ekki að fylgja eftir þessari frábæru markvörslu í síðari hálfleik og það reyndist Gróttu um megn. Smám saman breikkaði bilið á milli liðanna og í stöðunni 21-15 var ballið búið.

Gróttumenn neituðu samt að láta niðurlægja sig. Börðust allt til enda á meðan HK slakaði á klónni. Sigurinn því ekki eins stór og hann hefði getað orðið.

HK-liðið á enn nokkuð í land en liðið gerði það sem þurfti í kvöld. Margir leikmanna liðsins eiga mikið inni. Ánægjulegt var samt að sjá Arnór Frey í markinu en hann varði vel allan leikinn. Ólafur Víðir vann sig einnig vel inn í leikinn og var drjúgur. Atli Ævar aftur á móti mjög sterkur allan leikinn.

Gróttuliðið er betra en margur heldur og það verður ekki niðurlægt í allan vetur eins og einhverjir telja. Lárus flottur í markinu og leikmenn liðsins baráttuglaðir en gæðin ekki næg til að vinna lið eins og HK.

HK-Grótta  25-22 (11-9)

Mörk HK (skot): Atli Ævar Ingólfsson 6 (6), Bjarki Már Elísson 5 (10/1),  Bjarki Már Gunnarsson 4 (8), Ólafur Bjarki Ragnarsson 4 (10), Ólafur Víðir Ólafsson 2 (2), Leó Snær Pétursson 2 (5), Vilhelm Gauti Bergsveinsson 1 (2), Tandri Már Konráðsson 1 (6).

Varin skot: Arnór Freyr Stefánsson 18/1 (40/1) 45%.

Hraðaupphlaup: 4 (Bjarki Gunn. 2 Bjarki Elís, Vilhelm).

Fiskuð víti: 1 (Atli).

Utan vallar: 10 mín.

Mörk Gróttu (skot): Þorgrímur Ólafsson 6 (9), Árni Benedikt Árnason 6 (10/1), Jóhann Gísli Jóhannesson 5 (10), Friðgeir Elí Jónasson 2 (6), Ágúst Birgisson 1 (2), Benedikt Reynir Kristinsson 1 (3), Hjálmar Þór Arnarsson 1 (2).

Varin skot: Lárus Ólafsson 16 (37/1) 43%, Magnús Sigmundsson 3 (7) 43%.

Hraðaupphlaup: 5 (Jóhann 2, Árni, Ágúst, Þorgrímur).

Fiskuð víti: 1 (Jóhann).

Utan vallar: 8 mín.

Dómarar: Bóas Börkur Bóasson og Hörður Aðalsteinsson, þrælfínir.