Grótta fær liðsstyrk - leikmenn Fylkis finna sér ný félög

Elín Helga Jónsdóttir og Heiða Ingólfsdóttir hafa gengið frá þriggja ára samningum við Gróttu. Þær koma báðar úr Fylki sem ákvað nýverið að senda ekki lið til leiks í N1-deild kvenna í vetur.

Elín Helga er uppalin hjá Fylki. Í fréttatilkynningu frá Gróttu kemur fram að hún geti leyst allar stöður fyrir utan. Hún skoraði 29 mörk með Fylki í fyrra.

Heiða er hins vegar uppalin í Vestmannaeyjum og er markvörður. Báðar eiga þær að baki landsleiki með yngri landsliðum Íslands.

Fyrr í vikunni gekk Sunna María Einarsdóttir til liðs við Gróttu en hún var einnig á mála hjá Fylki.