Hamilton sneggstur á seinni æfingunni í Abú Dabí

Lewis Hamilton á McLaren náði besta tíma á seinni æfingu Formúlu 1 liða á Yas Marina brautinni í Abú Dabí í dag, en liðsfélagi hans hjá McLaren liðinu, Jenson Button náði næstbesta tíma. Hamilton ók á tímanum 1.39.586, en Button var 0.199 úr sekúndu á eftir honum.

Ökumenn Formúlu 1 liðanna óku á tveimur æfingum í dag og unnu að því að stilla bílunum upp fyrir Abú Dabí brautina. Button náði besta tíma á fyrri æfingu dagsins og varð á undan Mark Webber á Red Bull, en Hamilton sá við Button á seinni æfingunni. Þriðja og síðasta æfingin fer fram á laugardag og tímatakan einnig.

Í tímatökunni á meistarinn Sebastian Vettel möguleika á því að jafna met Nigel Manseel hvað árangur í tímatökum varðar frá árinu 1992. Þá náði Mansell 14 sinnum besta tíma í tímatökum á sama keppnistímabili. Vettel hefur 13 sinnum verið með besta tíma í tímatökum á þessu ári.

Vettel brást bogalistinn á seinni æfingunni í dag og varð að hætta akstri, eftir að Red Bull bíll hans snerist útaf brautinni og rakst á öryggisvegg. Bíll hans var fluttur á þjónustusvæðið af starfsmönnum á brautinni og eftir nokkuð hlé komst Vettel í brautina á ný undir stýri á bíl sínum.

Fernando Alonso snerist einnig útaf á seinni æfingunni og lenti á öryggisvegg. Hann ók ekki meira eftir það atvik.

Bein útsending verður frá lokaæfingu keppnisliða á Stöð 2 Sport kl. 09.55 í fyrramálið, en bein útsending hefst frá tímatökunni kl. 12.45 og verður hún í opinni dagskrá.

Tímarnir frá autosport.com



1. Lewis Hamilton McLaren-Mercedes 1m39.586s

2. Jenson Button McLaren-Mercedes 1m39.785s + 0.199

3. Fernando Alonso Ferrari 1m39.971s + 0.385

4. Felipe Massa Ferrari 1m39.980s + 0.394

5. Mark Webber Red Bull-Renault 1m40.104s + 0.518

6. Sebastian Vettel Red Bull-Renault 1m40.132s + 0.546

7. Michael Schumacher Mercedes 1m40.553s + 0.967

8. Adrian Sutil Force India-Mercedes 1m40.951s + 1.365

9. Paul di Resta Force India-Mercedes 1m41.021s + 1.435

10. Kamui Kobayashi Sauber-Ferrari 1m41.490s + 1.904

11. Sergio Perez Sauber-Ferrari 1m41.565s + 1.979

12. Sebastien Buemi Toro Rosso-Ferrari 1m41.680s + 2.094

13. Vitaly Petrov Renault 1m41.947s + 2.361

14. Jaime Alguersuari Toro Rosso-Ferrari 1m41.983s + 2.397

15. Bruno Senna Renault 1m42.369s + 2.783

16. Rubens Barrichello Williams-Cosworth 1m42.798s + 3.212

17. Pastor Maldonado Williams-Cosworth 1m42.910s + 3.324

18. Heikki Kovalainen Lotus-Renault 1m43.562s + 3.976

19. Jarno Trulli Lotus-Renault 1m44.050s + 4.464

20. Nico Rosberg Mercedes 1m44.265s + 4.679

21. Timo Glock Virgin-Cosworth 1m45.486s + 5.900

22. Jerome D'Ambrosio Virgin-Cosworth 1m46.142s + 6.556

23. Tonio Liuzzi HRT-Cosworth 1m46.249s + 6.663

24. Daniel Ricciardo HRT-Cosworth 1m46.328s + 6.742