Ragnar Jóhannsson spilar æfingaleiki með Gummersbach

Selfyssingurinn Ragnar Jóhannsson stóð sig vel á æfingum hjá þýska liðinu VfL Gummersbach og félagið vill nú fá að skoða hann betur. Ragnar mun því spila tvo æfingaleiki með liðinu í Frakklandi og í framhaldinu verður tekin ákvörðun um hvort að hann fái samning.

Ragnar er hægri skytta og hefur farið á kostum með Selfossliðinu í N1 deild karla í vetur. Ragnar er langmarkahæsti maður deildarinnar með 102 mörk í 11 leikjum eða 9,3 mörk að meðaltali í leik.

Ragnar er fæddur árið 1990 og varð tvítugur í október síðastliðnum. Hann hefur spilað með hinu sterka 1990-landsliði Íslands sem náði meðal annars silfri á HM 18 ára landsliða í Túnis árið 2009.