Masters: Bubba Watson vann sitt fyrsta risamót

Bubba Watson tryggði sér sigur á Mastersmótinu í golfi í kvöld eftir að hann vann Suður-Afríkumanninn Louis Oosthuizen í bráðabana.

Watson komst í bráðabanann með frábærri spilamennsku á síðustu níu holunum en náði meðal annars að fá fugl á fjórum holum í röð.

Louis Oosthuizen og Bubba Watson léku báðir holurnar 72 á tíu höggum undir pari. Það þurfti síðan tvær holur af bráðabana til þess að fá sigurvegara.

Bubba Watson og Louis Oosthuizen byrjuðu bráðabanann á 18. holu en ekki tókst að fá út sigurvegara þar þar sem þeir léku hana báðir á pari.

Bubba Watson fékk tækifæri til að tryggja sér sigurinn en klikkaði þá á stuttu pútti. Watson hafði einnig klikkað á pútti fyrir sigrinum á lokaholunni á hringnum.

Þeir fóru næst yfir á tíundu holu þar sem Bubba Watson kom sér í vandræði en náði síðan ótrúlegu höggi úr erfiðri stöðu inn á flöt. Louis Oosthuizen var nálægt því að setja sitt pútt ofan í en tókst það ekki og því mátti Watson tvípútta.

Bubba Watson tvípúttaði og tryggði sér sigur á Mastersmótinu.