Fjölnismenn á toppinn í 1.deildinni - úrslit dagsins

Fimm leikir fóru fram í fimmtu umferð 1. deildar karla í fótbolta í dag og bæði Fjölnir og Haukar komust upp fyrir topplið Þórs sem spilar ekki fyrr en á mánudaginn. Haukarnir unnu 2-0 sigur á Leiknismönnum sem eru enn án sigurs í sumar. Fjölnismenn fengu góða hjálp frá mótherjanum í 6-2 útisigri á Víkingum en Víkingar, sem komust í 1-0 og 2-1, skoruðu tvö sjálfsmörk í leiknum.

Fjölnismenn skoruðu fimm mörk í seinni hálfleik í 6-2 stórsigri í Víkinni en þetta var fyrsta tap Víkingsliðsins undir stjórn Ólafs Þórðarsonar. Helgi Sigurðsson opnaði markareikning sinn í sumar snemma leiks og Víkingsliðið komst í 1-0 og 2-1. Fjölnismenn gerðu jafntefli í fyrstu tveimur leikjum sínum en hafa núna unnið þrjá leiki í röð og skorað í þeim fjórtán mörk.

Fjölnir og Haukar eru bæði taplaus og með 11 stig en Fjölnir er með betri markatölu og situr því á toppnum. Bæði mörk Hauka í 2-1 sigri á botnliði Leiknis komu í seinni hálfeik en lærisveinar Willums Þórs Þórssonar í efra Breiðholtinu hafa aðeins náð í tvö stig í fyrstu fimm umferðunum. Ólafur Hrannar Kristjánsson skoraði mark Leiknis undir lokin en fékk rauða spjaldið mínútu síðar.

Víkingar úr Ólafsvík og ÍR-ingar unnu bæði endurkomusigur í sínum leikjum en KA og Tindastóll gerðu síðan jafntefli í fimmta og síðasta leik dagsins. Víkingar úr Ólafsvík eru með 10 stig og komust því líka upp fyrir Þór sem var á toppnum fyrir leiki dagsins.



Úrslit og markaskorarar í 1. deild karla í dag:

Haukar - Leiknir R. 2-1

1-0 Gunnlaugur Fannar Guðmundsson (53.), 2-0 Hilmar Trausti Arnarsson, víti (61.(), 2-1 Ólafur Hrannar Kristjánsson (89.)

ÍR - Höttur 2-1

0-1 Þórarinn Máni Borgþórsson (9.), 1-1 Halldór Arnarsson (51.), 2-1 Elvar Páll Sigurðsson (56.)

Víkingur R. - Fjölnir 2-6

1-0 Helgi Sigurðsson (14.), 1-1 Sjálfsmark (16.), 2-1 Sjálfsmark (23.), 2-2 Sjálfsmark, 2-3 Pablo Punyed (66.), 2-4 Ágúst Örn Arnarson (70.),2-5 Bergsveinn Ólafsson (83.), 2-6 Ásgeir Aron Ásgeirsson (86.)

KA - Tindastóll 2-2

0-1 Ben J Everson (11.), 1-1 Brian Gilmour (15.), 2-1 Ævar Ingi Jóhannesson (28.), 2-2 Ingvi Hrannar Ómarsson (44.)

Víkingur Ó. - Þróttur R. 2-1

0-1 Oddur Björnsson (70.), 1-1 Eldar Masic (75.), 2-1 Guðmundur Steinn Hafsteinsson (82.)

Upplýsingar um markaskorara í leikjunum eru fengnar að hluta frá fótbolti.net og að hluta frá úrslit.net.