Alonso náði ráspól í rigningunni á Silverstone

Fernando Alonso á Ferrari verður á ráspól í breska kappakstrinum á morgun. Hann var fljótastur í tímatökum í dag sem hófust aftur eftir að hafa verið frestað vegna veðurs.

Úrhelli gerði rétt áður en lota tvö hófst svo tímatökunni var frestað vegna aðstæðna. Alonso ók svo hraðast í síðustu lotunni og Ferrari bíllinn leit vel út og Spánverjinn þurfti ekki að berjast mikið fyrir veggripi.

Þetta er fyrsti ráspóll Alonso síðan árið 2010. Felipe Massa, liðsfélagi Alonso hjá Ferrari, náði besta árangri sínum í ár í tímatökum. Hann ræsir fimmti.

McLaren liðið náði ekki að laga sig að aðstæðum. Lewis Hamilton ræsir áttundi og Jenson Button var óheppinn í fyrstu lotunni og ræstir átjándi í kappakstrinum á morgun.

Annar á ráslínu verður Mark Webber á Red Bull og þriðji verður Michael Schumacher á Mercedes. Sebastian Vettel ræsir svo fjórði á undan Massa. Þá ræsir Kimi Raikkönen sjötti og Pastor Maldonado sjöundi.

Nico Hulkenberg á Force India og Romain Grosjean á Lotus ræsa í níunda og tíunda sæti. Sá síðastnefndi átti í vandræðum í lokalotunni og skautaði útaf svo hann gat ekki haldið áfram.

Forvitnilegt verður að sjá í hvernig ástandi regndekk liðanna verður í kappakstrinum á morgun. Hver ökuþór fær aðeins tvo umganga af regndekkjum til að nota alla helgina og nú þegar eru dekkin örugglega orðin nokkuð slitin.