Signý: Heiður að vinna stigameistaratitilinn

"Það er heiður að vinna stigameistaratitilinn og sýnir að ég var stöðug í keppnisgolfinu í sumar,“ sagði Signý Arnórsdóttir úr Keili eftir að hún tryggði sér stigameistaratitilinn á Eimskipsmótaröðinn í golfi í dag á Grafarholtsvelli. Signý endaði í þriðja sæti á Símamótinu sem lauk í dag en hún varð Íslandsmeistari í holukeppni á þessu tímabili. "Það sem stendur upp úr er að hafa unnið Íslandsmótið í holukeppni og hafa náð stigameistaratitlinum. Það neikvæða var að ég var ekki að slá nógu vel seinni part sumars og það kom í veg fyrir að ég næði að sigra á fleiri mótum. Að undanförnu hef ég verið að vinna í því að breyta og bæta sveifluna mína og ég vona að það sé allt saman á réttri leið.“ Signý mun dvelja hér á landi við æfingar í vetur og hún stefnir á að koma sterk til leiks á næsta ári. "Ég ætla að æfa vel í Hraunkoti í vetur og líkamlegi þátturinn verður þar ofarlega á blaði. Ég verð í leikfimi hjá Gauta Grétarssyni sjúkraþjálfara – sérhannað fyrir kylfinga, og ég hef mikla trú á því,“ sagði Signý Arnórsdóttir stigameistarinn á Eimskipsmótaröðinni árið 2012.