Guðjón með sextánda markið á tímabilinu

Guðjón Baldvinsson skoraði mark Halmstad í 1-1 jafntefli á móti Landskrona í lokaumferð sænsku b-deildarinnar í dag. Guðjón skoraði 16 mörk á tímabilinu og varð þriðji markahæsti leikmaður deildarinnar.

Guðjón kom Halmstad í 1-0 á 32. mínútu og þannig var staðan þar til á 79. mínútu þegar að Fredrik Liverstam tryggði Landskrona eitt stig. Guðjón lék allan leikinn alveg eins og Kristinn Steindórsson.

Úrslit leiksins skiptu engu máli því það var þegar orðið ljóst að Halmstad myndi ekki ná tveimur efstu sætum deildarinnar. Halmstad verður því að fara í umspil við þriðja neðsta liðið í úrvalsdeildinni um sæti í úrvalsdeildinni á næsta sumar.

Það kemur ekki í ljós fyrr en á morgun hver mótherji Halmstad verður en eins og staðan er fyrir síðustu umferð þá situr Íslendingaliðið Sundsvall í því sæti.