Klæðir frægustu fyrirsætur heims

Ásdís Ágústsdóttir fluttist til Parísar fyrir einu og hálfu ári og hóf fatahönnunarnám í Paris American Academy, litlum en virtum skóla. Þar er hluti af náminu að vinna baksviðs á tískuvikunum í hátískuborginni til að fá reynslu og innsýn í bransann. Ásdís hefur unnið baksviðs hjá virtum hönnuðum og klætt þar margar af frægustu fyrirsætum heims. Í tilefni þess að stóru tískuvikurnar fara að bresta á spurði Lífið spurði Ásdísi út í þessa reynslu.

,,Ég hef fengið starfsnám bæði hjá Elie Saab og Rick Owens í gegnum skólann minn og það var virklega gaman og lærdómsríkt. Vinnudagarnir eru samt langir og strangir og mikið álag, en þetta er ómetanleg reynsla. Svo stendur okkur alltaf til boða að vinna baksviðs á tískuvikunum, en þær eru nokkrum sinnum á ári í París. Ásamt því að hafa unnið hjá Elie Saab og Rick Owens hef ég líka verið hjá Manish Arora, Basil Soda, Steffie Christiaens, Peachoo+Krejberg,Amaya Arzuaga,Arzu Kaprol og fleirum".

,,Baksviðs hef ég klætt margar ofurfyrirsætur. Þar á meðal eru Carmen Kass, Karlie Kloss, Anja Rubik, Jessica Stam, Valade Nimue Smit og fleiri. Þegar ég hitti þessar stelpur, sem ég hafði séð tugi af myndum af í gegnum tíðina, er athyglisvert hvað þær eru í raun ,,venjulegar" án farða og photoshop. Það sýnir kannski hvað fegurðarstuðlar nútímans eru óraunhæfir og fáránlegir því enginn lítur út eins og þessar fyrirsætur á forsíðunum. Ekki einu sinni þær sjálfar", segir Ásdís.

Ásdís er mjög ánægð í skólanum þó vissulega sé mikið að gera. Hún segir námið ekki eingöngu einblína á hönnunarferlið sjálft, heldur sé líka mikið lagt upp úr því að læra að gera flíkurnar eftir svokölluðum Haute Couture reglum. Það er afskaplega mikil nákvæmnisvinna sem er öll gerð í höndunum og getur tekið mjög langan tíma að búa til eina flík. ,,Við erum með mjög færa saumakennara sem kenna okkur þetta, eldri konur sem hafa verið í bransanum í tugi ára og hafa unnið bæði fyrir Balmain, Nina Ricci, Madame Grés og fleiri".

Það er margt spennandi framundan hjá Ásdísi, enda styttist í næstu tískuviku og þá er alltaf nóg að gera. Hún mun útskrifast í vor og vinnur að lokaverkefninu sínu. Einnig er hún er að fara að selja nokkra hluti eftir sig í Salka Reykjavík, búð í Kaupmannahöfn sem selur íslenska hönnun. Eftir útskriftina ætlar hún að halda áfram að hanna og sauma, það er það sem henni finnst skemmtilegast að gera.