Messi skoraði í átjánda deildarleiknum í röð

Barcelona vann öruggan sigur á Rayo Vallecano, 3-1, í spænsku úrvalsdeildinni í kvöld en leikurinn fór fram á Camp Nou í Barcelona.

Fyrsta mark leiksins skoraði David Villa á 25. mínútu leiksins en því næst var komið að Lionel Messi en hann gerði næstu tvö mörk leiksins á 40. mínútu og á þeirri 57.

Raúl Tamudo minnkaði muninn fyrir gestina tuttugu mínútum fyrir leikslok en lengra komust þeir ekki og niðurstaðan því 3-1 sigur Barca.

Barcelona er sem fyrr í efsta sæti deildarinnar með 74 stig, 13 stigum á undan Real Madrid sem er í öðru sæti.

Lionel Messi hefur skorað 42 mörk á tímabilinu fyrir Barcelona og í 18 deildarleikjum í röð.

Staðan í spænsku úrvalsdeildinni.