Kári tekur aftur við kvennaliði Gróttu

Kári Garðarsson mun þjálfa kvennalið Gróttu næstu tvö árin en hann skrifaði í gær undir  tveggja ára samning og mun taka við liðinu af fráfarandi þjálfara, Ómari Erni Jónssyni. Kári tekur því aftur við kvennaliði Gróttu sem hann þjálfaði síðast 2005-2006.

Kári hefur starfað lengi við þjálfun hjá Gróttu og var á síðasta ári aðstoðarþjálfari Ágústs Jóhannessonar við þjálfun meistaraflokks karla og þjálfaði jafnframt 3. flokk karla hjá félaginu

„Ég er spenntur að taka við þessu starfi hjá Gróttu“ segir Kári Garðarsson. „Þetta átti sér mjög stuttan aðdraganda í vikunni. Ég hef verið ánægður hjá Gróttu og vera þátttakandi í uppbyggingu handboltans þar. Það er krefjandi starf að taka við þjálfun meistaraflokks kvenna og er það mín von að mér takist að koma Gróttu í hóp bestu liða landsins á samningstímanum," er haft eftir Kára í fréttatilkynningu frá Handknattleiksdeild Gróttu.

Grótta varð í 6. sæti þegar liðið lék síðast undir stjórn Kára 2005-06 en í vetur varð Gróttuliðið í 7. sæti í N1 deild kvenna og tapaði síðan 0-2 fyrir Fram í átta liða úrslitum úrslitakeppninnar.