Helmingi meiri laxveiði en í fyrra

Landsamband veiðifélaga greinir frá því á vef sínum að vikuveiðin nú sé 1508 laxar á sama tíma og þeir vorur 775 í fyrra. Meðalveiði í hliðstæðum vikum síðan 2006 er 914 laxar og aðeins einu sinni hafa aflabrögð verið betri en nú, en það var árið 2010 en þá gaf þessi vika 2061 lax.

Á vefnum eru varnaglar slegnir: "Það skal þó tekið fram að ekki er liðið langt á veiðitímabilið enn, og of snemmt að spá neinu um heildarafla sumarsins.  En veiðimenn eru jú bjartsýnir, eins og allir vita."

Þessar upplýsingar byggja á aflatölum en veiðar eru nú hafnar í 20 af þeim 25 ám sem Landsamband veiðfélaga hefur fylgst með undanfarin 8 ár. Miðast aflatölur við hvert miðvikudagskvöld. "Að kvöldi 26. júní voru komnir 1986 laxar á land úr þessum 20 ám, sem er tæpum 60 prósentum meiri afli en í fyrra."

Þá segir jafnframt að menn séu almennt sammála um að veiðin fari vel af stað og laxinn sé vel haldinn. Þetta bendir til þess að hann hafi átt góða vist í sjónum.