Leikmenn Hauka sjá um helming kostnaðar

Karlalið Hauka í handbolta mun taka þátt í Evrópu keppni á næsta tímabili en eins og svo oft áður er erfitt fyrir lið að ná endum saman þegar kemur að þátttöku í Evrópukeppni.

Undanfarin ár hafa leikmenn sjálfir þurft að standa straumi af kostnaði liðsins og gert það með ýmsum fjáröflunarleiðum. 

„Það er alveg himinn og haf á milli þess að taka þátt í Evrópukeppni í handbolta og síðan í fótbolta ,“ segir Matthías Árni Ingimarsson, leikmaður Hauka, í samtali við Vísi.

„Þetta hefur verið þannig hjá okkur í Haukum að við leikmenn sjáum um helming kostnaðarins og síðan sér klúbburinn um hinn helminginn.“

Ýmsar leiðir hafa verið farnar í fjáröflun Hafnfirðinga.

„Við höfum verið mikið í þessum hefðbundnu leiðum eins og sala á klósettpappír, happdrætti og sala á fiski.“

„Á síðasta tímabili gekk þetta allt saman upp og við náðum að safna fyrir okkar helmingi, veit svo sem ekkert hvernig fjárhagslega staðan var á hlutunum hjá klúbbnum sjálfum.“

„Þetta er mjög skemmtileg reynsla og þá sérstaklega fyrir yngri leikmenn liðsins sem hafa aldrei tekið þátt í Evrópukeppni.“