HRingurinn fer af stað með látum

Tölvuleikjaspilarar hvaðanæva af landinu sitja nú sveittir í húsakynnum Háskólans í Reykjavik og heyja hatramma baráttu í sýndarheimum. Ekkert pulsupartý segja skipuleggjendur en öfugt á við landann lofa þau vonda veðrið.

Önnur hæð Háskólans í Reykjavík var þéttsetin þegar fréttastofu bar að garði í dag. Þar sátu hátt í tvö hundruð spilarar á öllum aldri, umkringdir hálftómum pizzakössum og orkudrykkjum, ásamt stöku kaffibolla. Allt eru þetta heppilegir ferðafélagar í sýndarheimi þar sem spilararnir tókust á.

HRingurinn fer nefnilega fram um helgina en hér mætast spilarar í hinum ýmsu tölvuleikjum. Það er Tvíund, félag tölvunarfræðinema í HR, sem stendur fyrir þessu árlega móti og það hefur aldrei verið sótt jafn vel og í ár.

„Við erum sennilega eina fólkið á Íslandi sem lofar vonda veðrið," segir Bjarni Egill Ögmundsson, skemmtanastjóri hjá Tvíund. „Spáin er góð fyrir okkur. Það er inniveður í dag eða LAN-veður eins og við köllum það."

„Þetta er alls ekkert pylsupartý. Þetta hentar öllum og það er auðvitað gaman að sjá stelpurnar hérna. Þær mættu auðvitað vera aðeins fleiri," segir Áslaug Sóllilja, formaður nemendafélags Tvíundar.

HRingurinn er fúlasta alvara. Úrslitin fara fram á morgun og vinningarnir eru álíka fjölbreyttir og þeir eru margir. Í þessum leikjum skiptir herkænska og útsjónarsemi sköpum, sem og sjálft þolið enda var loftið nokkuð þungt í HR í dag.

„Allir íþróttamenn verða að geta spilað við hvaða aðstæður sem er. Þannig að við viljum þjálfa liðin okkar í að geta spilað undir öllum aðstæðum. Þú verður bara að standa þig,“ segir Bjarni Egill.

„Fólk kemur hingað með dýnur og svefnpoka. Við rekumst stundum á einhvern sofandi undir tækjabúnaðinum. Þannig að menn kunna að redda sér, það er óhætt að segja það.“

Hægt er að nálgast beina útsendingu frá keppninni hér.