Sjö verslanir áminntar vegna skorts á verðmerkingum

Fulltrúar Neytendastofu könnuðu verðmerkingar hjá sérverslunum í Smáralind.  Farið var í 69 verslanir með margskonar rekstur og skoðað hvort verðmerkingar í sýningargluggum væru í lagi þar sem við átti. Einnig var athugað hvort verðmerkingar voru í lagi inni í verslununum. Þetta kemur fram í frétt á vef Neytendastofu.

Þegar skoðað var inn í verslanir var ástand verðmerkinga almennt í góðu lagi en 66 af 69 verslunum voru í lagi.  Hjá verslunum Tal, 66°Norður og Zo-on vantaði verðmerkingar bæði inni í verslun og sýningarglugga en hjá verslunum Dorthy Perkins, Cintamani, Smash og Joe Boxer  voru einungis sýningargluggar óverðmerktir. Samanlagt fá því sjö verslanir bréf til áminningar um að laga verðmerkingar í verslunum sínum.

Þessari eftirlitsferð verður fylgt eftir með bréfi eins og áður sagði og síðar annarri eftirlitsferð þar sem skoðað verður hvort tilefni er til að beita sektum.