Messi borgaði skattinum rúmar 800 milljónir

Lionel Messi og faðir hans hafa nú gert upp skuld sína hjá spænska skattinum samkvæmt fréttum á Spáni en mál þeirra var á leiðinni fyrir dómstóla.

Spænskir fjölmiðlar hafa birt fréttir af uppgjöri feðganna þótt að ekki hafi komið formleg staðfesting frá yfirvöldum.

Messi-feðgarnir borguðu fimm milljónir evra í sekt sem gera rúmlega 800 milljónir íslenskra króna. Þeir borga því milljón meira en umrædd skuld sem var fjórar milljónir.

Skatturinn taldi Messi-feðgana skulda skatta vegna tekna þeirra af sölu á ímynd hans á árunum 2006 til 2009.

Feðgarnir áttu að koma fyrir dómara í þessum mánuði en nú virðist málið vera úr sögunni. Þeir héldu alltaf fram sakleysi sínu en hafa ákveðið engu að síður að gera upp til að loka málinu sem fyrst.