Smámálameðferð athuguð í haust

Athugun á því hvort innleiða megi svokallaða smámálameðferð í íslenskt dómskerfi mun hefjast í haust. Þetta segir Steinunn Valdís Óskarsdóttir, sérfræðingur hjá innanríkisráðuneytinu.

„Þessi vinna fer af stað með haustinu í tengslum við stefnumörkun í neytendamálum hér á landi,“ segir Steinunn.

Hún var formaður starfshóps um skipulag neytendamála sem skilaði af sér skýrslu í desember síðastliðnum. Starfshópurinn lagði til að hafin yrði „vinna innan innanríkisráðuneytis við að skoða frekari útfærslur á smámálameðferð,“ sem nú stendur til að hefja.

Hún segir smámálameðferð geta falið í sér mikla framför fyrir neytendur, enda felur hún í sér hraðari og einfaldari úrlausn smærri deilumála fyrir dómstólum.

„Það hefur aldrei verið mörkuð neytendastefna á Íslandi. Það er til opinber stefna í fjarskiptum og samgöngum og ýmsu öðru en ekki í neytendamálum. Ráðuneytið ætlar að fara af stað með þá vinnu og í tengslum við það verða skoðaðar útfærslur á þessari smámálameðferð,“ segir Steinunn.

Hún segir smámálameðferð þekkta á hinum Norðurlöndunum.

Hvað eru smámál?

Smámál hafa ekki verið skilgreind í íslenskum lögum en í meistararitgerð Aldísar Geirdal við lagadeild Háskólans í Reykjavík um smámálameðferð eru smámál skilgreind sem mál þar sem stefnufjárhæð er undir tveimur milljónum.

„Smámálameðferð felur í sér einfaldari og hraðari málsmeðferð fyrir dómstólum ef hagsmunirnir eru undir ákveðnu viðmiðunarmarki eða ef dómari telur forsvaranlegt að reka málið samkvæmt reglum smámálameðferðar,“ segir Aldís Geirdal.