Aðstaða við skemmtiferðaskip fer í útboð

Leiga þjónustumiðstöðvarinnar á Skarfabakka fyrir næsta sumar verður boðin út samkvæmt ákvörðun hafnarstjórnar Faxaflóahafna á föstudag.

Fyrirtækið Iceland Travel Assistance (ITA) hefur haft þjónustumiðstöðina á leigu allt frá upphafi, eða frá apríl 2008. Samningurinn rennur út næsta vor og sóttist ITA eftir að hann yrði framlengdur til 1. október 2014.

Þá hafði fyrirtækið Icecard óskað eftir svæði á Skarfabakka á leigu undir sölutjöld frá og með næsta vori. Þar sem aðstaðan verður boðin út synjaði hafnarstjórnin báðum þessum beiðnum.

Í minnisblaði sem lagt var fyrir hafnarstjórn á föstudag er lagt til að skoðað verði að hafa leigutímann fimm ár en ekki þrjú eins og verið hefur. Einnig á að afmarka skika á lóð við hlið þjónustumiðstöðvarinnar sem viðbótarathafnasvæði fyrir leigutakann.

„Þannig yrði öll umsýsla og stjórnun verslunarumsvifa á einni hendi,“ er bent á í minnisblaðinu.