Húsnæðisverð heldur áfram að hækka

„Við erum að reikna með því að húsnæðisverð haldi áfram að hækka með svipuðum hætti og það hefur gert,“ segir Ingólfur Bender, forstöðumaður Greiningar Íslandsbanka. 

Bankinn birti í gær tölur í Morgunkorni sínu sem sýna að húsnæðisverð hér á landi hækkaði um 4,9 prósent á öðrum ársfjórðungi þessa árs samanborið við sama tímabil í fyrra. 

Ingólfur segir hækkunina meðal annars mega rekja til þess að kaupmáttur hefur vaxið, störfum fjölgað og atvinnuleysi minnkað. 

„Viðsnúningurinn í hagkerfinu sem við fórum að finna fyrir árið 2010 hefur verið að valda þessari hækkun á húsnæðisverði. Þá tók landsframleiðslan við sér og húsnæðisverð fór að hækka að nýju,“ segir hann. 

Ari Skúlason, hagfræðingur hjá hagfræðideild Landsbankans, tekur í sama streng og Ingólfur og segir hækkunina aðallega tengjast þróuninni í hagkerfinu. 

„Ég hugsa að við eigum eftir að sjá meiri verðhækkanir á íbúðarhúsnæði á næstu árum og þá auðvitað að einhverju leyti í takt við hagsveifluna sem verður vonandi meiri með auknum hagvexti,“ segir Ari.

Hann bendir einnig á að byggingarkostnaður hefur hækkað á undanförnum árum.

„Hærri byggingarkostnaður þýðir að þegar við förum að selja meira af nýju húsnæði þá verður það dýrara og hefur áhrif á allan markaðinn.“

Þessi þróun á húsnæðisverði hér á landi er önnur en á evru-svæðinu. Samkvæmt tölum hagstofu Evrópusambandsins var verð á íbúðarhúsnæði 2,2 prósentum lægra á öðrum ársfjórðungi þessa árs samanborið við sama tímabil árið 2012. 

Á hinum Norðurlöndunum er þróunin svipuð og hér. Húsnæðisverð í Noregi hækkaði um 5,5 prósent á öðrum ársfjórðungi miðað við sama tíma í fyrra og um 4,6 prósent í Svíþjóð 

Spurður hvort verðbóla á fasteignamarkaði sé í uppsiglingu segir Ingólfur að það séu engin sýnileg merki um slíkt.

„Raunverðshækkun íbúðahúsnæðis frá árinu 2010, þegar við náðum botninum, er tiltölulega lítil og raunverð íbúðarhúsnæðis í sögulegu ljósi er ekki hátt,“ segir Ingólfur.