Of mikið tangódjamm

Tónlist

Yo La Tengo

Iceland Airwaves-hátíðin

Harpa-Silfurberg



Það voru margir búnir að bíða lengi eftir að sjá bandarísku hljómsveitina Yo La Tengo en hún hefur verið starfandi frá árinu 1984. Sveitin lék á Iceland Airwaves í Hörpu á fimmtudagskvöld og voru þetta fyrstu tónleikar hennar hér á landi.

Yo La Tengo á sér marga aðdáendur hér á landi. Sveitin gaf nýverið út plötuna Fade og er að fylgja henni eftir á tónleikaferðalagi um þessar mundir.

Tónleikarnir byrjuðu vel og troðfullt var út úr dyrum þegar sveitin hóf leik. Yo La Tengo skipa hjónin Ira Kaplan og Georgia Hubley sem stofnuðu sveitina á sínum tíma og James McNew sem gekk til liðs við hana árið 1989. McNew leikur aðallega á bassa en greip líka í gítarinn. Hann gerði sér lítið fyrir og sleit tvo strengi á miðjum tónleikunum, fipaðist þó ekkert og kláraði lagið.

Hátindur tónleikanna var þegar hljómsveitin lék lagið Ohm af nýjustu plötu sinni. Þægilegt og skemmtilegt lag. Að því lagi loknu sigu tónleikarnir heldur niður á við. Langir gítarkaflar reyndu á þolinmæði tónleikagesta og heldur fór að fækka í salnum sem áður var troðfullur. Jón Júlíus Karlsson

Niðurstaða: Fín tónlist en óþarflega langir gítardjammkaflar báru athygli tónleikagesta ofurliði.