Kaupa sér ódýrari og sparneytnari bíla

Íslensk fyrirtæki kaupa í auknum mæli minni atvinnubíla en áður og sparneytnari. Þannig sníða þau sér stakk eftir vexti í breyttu viðskiptaumhverfi.

„Fyrirtæki eru ekki í neinu rosalegu fjárfestingastuði almennt en þau sem eru að kaupa leita að hagkvæmum lausnum og kaupa heldur ódýrari og sparneytnari bíla,“ segir Páll Þorsteinsson, upplýsingafulltrúi Toyota.

Að sögn Páls eyða nýrri bílar mun minna bensíni en fimm til sjö ára gamlir bílar. „Ef þú ert með fyrirtækjabíl sem er verið að keyra kannski einhver hundruð kílómetra á dag þá er þetta svo fljótt að telja.“

Aðspurður segir hann þróunina vera hæga. „Fyrirtæki hafa almennt haldið að sér höndum í fjárfestingum en þau sem eru að kaupa bíla eru að leita eftir hagkvæmari bílum í rekstri.“ Nefnir hann hybrid-bensínbíla sem dæmi. „Þegar maður bremsar hendir maður orkunni en hybrid-bílarnir nýta þessa orku og búa til rafmagn úr henni.“

Ívar Sigþórsson, sölustjóri Volkswagen atvinnubíla, segir að það sem hafi breyst frá hruni sé að fyrirtæki leiti í auknum mæli að bílum sem henta. Þar hafi minni sendibílar komið sterkt inn.

„Volkswagen Caddy er sem dæmi vinsælasti atvinnubíllinn á landinu. Það segir eitthvað um breytingarnar á markaðnum,“ segir Ívar en Caddy er lítill kassalaga bíll með rennihurðum. „Það er tvennt sem hefur breyst. Auðvitað hefur eldsneytisverð áhrif og líka verð á bílum. Menn eru að sníða sér meira stakk eftir vexti.“

Ívar segir sterkar vísbendingar um að salan á stærri bílum sé að aukast og markaðurinn að stækka. Til marks um það hafi þeir í fyrsta sinn frá hruni komist yfir tvö hundruð bíla sölumarkið í ár.

Agnar Daníelsson, sölustjóri atvinnubíla hjá Mercedes Benz, segir að fyrirtæki horfi meira en áður í hagkvæmni í kaupum, hvað eyðslu og rekstur varðar.

„Þau eru ekkert endilega að kaupa ódýrari bíla heldur horfa þau meira í hvað bíllinn kostar þau á endanum. Menn horfa meira í að eiga bílinn í fimm ár heldur en eitt eða tvö.“