The Banker verðlaunar Arion banka

Arion banki varð fyrir valinu hjá tímaritinu The Banker, sem gefið er út af The Financial Times, sem banki ársins á Íslandi árið 2013.

„Er þetta í fyrsta skipti frá árinu 2007 sem tímaritið veitir íslenskum banka þessa viðurkenningu og er það til marks um þann árangur sem náðst hefur á undanförnum árum við uppbyggingu nýs fjármálakerfis hér á landi,“ segir í tilkynningu Arion banka.

Höskuldur H. Ólafsson, bankastjóri Arion banka, veitti fyrir helgi viðurkenningunni móttöku fyrir hönd bankans. Starfsfólki bankans var svo greint frá viðurkenningunni á föstudag.

„Í rökstuðningi fyrir vali sínu á Arion banka litu fulltrúar tímaritsins ekki síst til árangurs bankans við að auka fjölbreytni fjármögnunar,“ segir í tilkynningunni, en bankinn hefur sótt sér nýja fjármögnun bæði hér á landi sem og erlendis og minnkað þar með vægi innlána í fjármögnun.

„Fyrr á árinu gaf Arion banki út skuldabréf í norskum krónum og varð þar með fyrsti íslenski bankinn frá árinu 2007 til að gefa út skuldabréf í erlendri mynt.“ Að auki var bankinn fyrstur íslenskra fjármálafyrirtækja til að gefa út óverðtryggð sértryggð skuldabréf á innlendum markaði.

Tímaritið er einnig sagt hafa horft til árangurs sem náðst hafi við að lækka hlutfall lána í alvarlegum vanskilum í lánasafni bankans. „Íslenskir bankar hafa glímt við hátt hlutfall vanskila en hafa náð miklum árangri á undanförnum árum ekki síst í kjölfar þeirrar umfangsmiklu vinnu sem farið hefur fram við fjárhagslega endurskipulagningu fyrirtækja og heimila.“

Þá kemur fram í tilkynningu bankans að horft hafi verið til öflugrar vöruþróunar bankans auk frumkvæðis og nýjunga sem Arion banki hafi kynnt á íslenskum íbúðalánamarkaði á undanförnum árum. Þar á meðal séu óverðtryggð íbúðalán með fasta vexti til fimm ára.

„Einnig var horft til þeirra fjölbreyttu þjónustuleiða sem Arion banki býður viðskiptavinum sínum upp á og þá ekki síst Arion banka appsins fyrir snjallsíma sem hefur verið afar vel tekið af viðskiptavinum bankans.“

Haft er eftir Höskuldi að virkilega ánægjulegt hafi verið fá viðurkenningu þessa virta fagtímarits.

„Okkar markmið á undanförnum árum hefur verið að byggja upp góðan banka. Það uppbyggingarstarf hefur bæði falið í sér að taka á erfiðum úrvinnslumálum frá fyrri tíð en einnig að horfa fram á veginn og leita nýrra leiða til að veita okkar viðskiptavinum góða þjónustu og mæta síbreytilegum þörfum þeirra. Starfsfólk bankans á hrós skilið fyrir þeirra góða starf, þetta er viðurkenning á þeirra störfum,“ segir hann.