Leður púffar með fallegum boðskap

Lína Móey og Ágústa Dagmar reka netverslunina Silvan.is og selja leðurpúffa.

Þetta átti bara að vera gæluverkefni en vörurnar frá Marokkó eru svo fallegar að ég gat ekki annað en slegið til,“ segir Lína Móey sem nú flytur inn leðurpúffa í mörgum skemmtilegum litum ásamt vinkonu sinni, Ágústu Dagmar.

„Mig langaði að opna verslun og var með ákveðna framtíðarsýn svo ég lagðist í rannsóknarvinnu á netinu og fann þessa fallegu púffa.“ Púffarnir eru handunnir og hverjum púffa fylgir ævintýralegur texti með mismunandi boðskap, eftir textahöfundinn Sölva Fannar.

„Fólk man eftir þessum púffum frá því í gamla daga og þá má vel vera að þeir finnist í gömlum geymslum hjá fjölskyldunni en við vildum vera með meiri fjölbreytni hvað varðar liti og útsaum á púffunum.“ Hægt er að panta púffana hjá netversluninni silvan.is og fá senda heim, innpakkaða fyrir jólin. Púffarnir koma ófylltir og segist Lína Móey fylla sína eigin púffa með gömlum rúmfötum, handklæðum, fötum og jafnvel dagblöðum.