Seldi í Högum fyrir tíu milljónir

Lárus Óskarsson, framkvæmdastjóri Aðfanga, sem er alfarið í eigu Haga, seldi í dag bréf í Högum fyrir um tíu milljónir króna. Þetta kemur fram í tilkynningu til Kauphallarinnar.

Lárus seldi 250 þúsund hluti á genginu 40,95. Samkvæmt tilkynningunni á hann enn 967.586 hluti í félaginu. Markaðsverðmæti þeirra er um 40 milljónir króna samkvæmt skráðu gengi bréfanna.

Hagar birtu síðastliðinn föstudag uppgjör sitt fyrir þriðja ársfjórðung 2013. Þar kom fram að félagið hagnaðist um 800 milljónir króna á tímabilinu og um 2,7 milljarða á fyrstu níu mánuðum ársins.