Arion banki býður nýjan höfuðstólstryggðan fjárfestingarkost

Í fyrsta sinn frá árinu 2008 býðst innlendum fjárfestum val um fjárfestingu á innlánaformi með ávöxtun hlutabréfamarkaðarins án þess að hætta sé á að höfuðstóll innlánsins skerðist en þetta kemur fram í fréttatilkynningu frá Arion-banka.

Um er að ræða svonefnt sérsniðið innlán en með þessari nýju fjárfestingarleið er Arion banki að svara kalli viðskiptavina eftir fjölbreyttari fjárfestingarkostum.

Sérsniðin innlán eru samsett úr bundnu innláni annars vegar og ávöxtunarþætti sem kemur í stað hefðbundinna vaxta hins vegar. Ávöxtunarþátturinn tengist gjarnan ákveðnum markaði svo sem hlutabréfamarkaði eða skuldabréfamarkaði.

Algengt er að ávöxtunarþáttur sérsniðinna innlána ákvarðist af árangri tiltekinnar vísitölu sem einkennir viðkomandi markað.

Sérsniðin innlán Arion banka fylgja ávöxtun íslensku OMXI6CAP vísitölunnar sem skráð er í Kauphöll Íslands og eru bundin í sex mánuði.

Lágmarksinnlán er fimm milljónir króna og höfuðstólstrygging getur verið 100%. Þannig  þurfa fjárfestar ekki að hætta höfuðstólnum þó árangur vísitölu eða verðbréfa reynist lakari en vænst var.

Einnig geta fjárfestar valið lægri höfuðstólstryggingu og átt þar með kost á hærri ávöxtun en sem nemur ávöxtun íslensku OMXI6CAP vísitölunnar á tímabilinu.