Ríkið mun þurfa að leggja til sífellt meiri fjármuni í LÍN

Lánasjóður íslenska námsmanna hefur sent fréttatilkynningu þar sem farið er yfir niðurstöður skýrslu um fjárhagslega áhættu í rekstri LÍN. Þar kemur fram að opinber stuðningur við námsmenn vaxi í hlutfalli við námstíma og upphæð námslána.

Fram kemur að námstími sé að lengjast og fjárhæð lána námsmanna að hækka. Því hærri sem námslánin eru því minni líkur séu á fullri endurheimtu.

Í skýrslunni kemur fram að afskriftir námslána og vaxtaafsláttur fela í sér verulegan opinberan stuðning við námsmenn. 

Þessi stuðningur er um 37% fyrir heildarlánasafn sjóðsins en fer hækkandi og var um 47% af útlánum ársins 2012.  Miðað við óbreytta þróun mun ríkið þurfa að leggja LÍN til sífellt meiri fjármuni.

Þessar tölur koma fram í skýrslu um fjárhagslegar áhættur í rekstri LÍN sem Summa Ráðgjöf slf. vann fyrir LÍN á grunni upplýsinga úr reiknilíkani Ríkisendurskoðunar um framlagsþörf LÍN.

Nafnvirði útlána 185 milljarðar

Í lok ársins 2012 var nafnvirði útlána LÍN 185 milljarðar króna og höfðu útlán LÍN vaxið um nærri 60% frá árinu 2008. 

Núvirði lánanna er nokkuð lægra en nafnvirði þeirra eða um 116 milljarðar króna, sem nemur 63% nafnvirðisins, sem sýnir innbyggðan opinberan stuðning við námsmenn miðað við fyrirkomulag námslána.

Samkvæmt skýrslunni aukast afföll námslána í réttu hlutfalli við upphæð lánanna og lengd endurgreiðslutímans. Þannig er t.d. áætlað að tæplega helmings eftirgjöf felist í námsláni á bilinu 7,5-10 milljónir króna.

Heildarlán námsmanna sem skulda undir 5 milljónum króna hafa lítið breyst síðustu fimm ár. Hins vegar hefur mikil aukning orðið í lánum yfir 7,5 milljónir.

Ef horft er til lána yfir 7,5 milljónir þar sem endurgreiðslur eru ekki hafnar þá hefur fjárhæð þeirra fimmfaldast á síðustu fimm árum, það er úr 5 milljörðum í 26 milljarða.  Heildarfjárhæð námslána yfir 7,5 milljónir er um 63 milljarðar.