S&P gefur Landsbankanum einkunnina BB+

Lánshæfismatsfyrirtækið Standard & Poor’s (S&P) gefur Landsbankanum lánshæfiseinkunnina BB+ og telur horfurnar stöðugar. Þetta kemur fram fréttatilkynningu bankans þar sem vísað er í mat S&P sem birt var í dag.

Þar kemur fram að S&P telji Landsbankann búa að umtalsverðu svigrúmi í lausa- og eiginfjárstöðu þrátt fyrir erfiðar aðstæður í efnahagslífinu. 

„Mat S&P á stöðugum horfum Landsbankans endurspeglar þær væntingar fyrirtækisins að eiginfjárgrunnur Landsbankans muni halda áfram að styrkjast og að bankinn muni endurskipuleggja skuldabréfin sem gefin voru út til LBI og eru á gjalddaga 2014-2018

S&P lýsir þeirri skoðun sinni að Landsbankinn hafi verið vel rekinn frá stofnun árið 2008, sýnt einstaka hagkvæmni í rekstri og tekist vel að draga úr vanskilum útlána. Þrátt fyrir smæð Landsbankans í alþjóðlegum samanburði, býr hann að frekar breiðum tekjugrunni, sterkri eiginfjárstöðu og góðri afkomu, samkvæmt mati S&P,“ segir í tilkynningu Landsbankans. Þar segir einnig að útreikningur S&P á hlutfalli leiðrétts eigin fjár Landsbankans á móti leiðréttum eignum hafi verið yfir tuttugu prósentum í septembermánuði 2013. Það hlutfall er að sögn bankans eitt það hæsta meðal þeirra alþjóðlegu viðskiptabanka sem S&P metur. 

„Þetta mat Standard & Poor‘s er ánægjulegt og á þeim nótum sem við ætluðum, m.a. í ljósi lánshæfiseinkunnar ríkissjóðs Sterk staða Landsbankans kemur skýrt fram í mörgum þeim þáttum sem metnir eru, sérstaklega er ánægjulegt að sjá mat á rekstri, áhættu og fjárhagsstöðu sem eru þeir þættir sem lögð hefur verið mikil áhersla á að bæta. Landsbankinn sóttist eftir lánshæfiseinkun til að auðvelda sér aðgengi að erlendum lánamörkuðum í framtíðinni. Þessi góða niðurstaða ætti að auka traust á bankanum og um leið er hún ein af mörgum vörðum á leið landsins að afnámi fjármagnshaftanna sem ekki síður er mikilvægt,“ segir Steinþór Pálsson, bankastjóri Landsbankans í tilkynningunni.