Woody Allen mun svara ásökunum um kynferðisofbeldi

Bandaríski leikstjórinn Woody Allen mun svara ásökunum dóttur sinnar um að hann hafi beitt hana kynferðislegu ofbeldi þegar hún var barn. Vanity Fair greinir frá þessu.

Dylan Previn, dóttir Allens og leikkonunnar Miu Farrow, birti bréf á vefsíðu New York Times um síðustu helgi þar sem hún lýsir ofbeldinu en leikstjórinn hefur ávallt neitað sök.

Að sögn New York Times er ekki hefð fyrir því að birta svör við aðsendum bréfum en engu að síður var ákveðið að gera það í þetta sinn þar sem um viðkvæmt mál er að ræða.

Ekki var gefin upp nákvæm tímasetning á birtingu svarsins en þó er búist við því að það verði innan fárra daga.