Lyfja sektuð um 250 þúsund krónur

Áfrýjunarnefnd neytendamála staðfesti ákvörðun Neytendastofu um 250 þúsund króna sekt á Lyfju fyrir að birta auglýsingar sem stofnunin hafði lagt bann við.

Í auglýsingunum sem um ræðir var kynntur kaupauki með Lancome vörum á tilteknu tímabili og tilgreint hvert verðmætið væri. Neytendastofa hafði áður bannað Lyfju að birta verðmæti kaupaauka í auglýsingum sínum þegar kaupaukinn samanstendur af vörum sem aldrei hafa verið boðnar til sölu í umræddri magnstærð.

Í úrskurði áfrýjunarnefndar neytendamála segir að áfrýjunarnefndin fallist ekki á þá aðferð að áætla verðmæti kaupaukans með því að umreikna verð á sömu vöru í annarri magnstærð yfir á kaupaukann. Ákvörðun Neytendastofu um að auglýsingarnar hefðu verið villandi væri því staðfest.