Þrítugasta vorrallið hafið

Vorrall Hafrannsóknastofnunar, þegar Hafró fer í stofnmælingu botnfiska á Íslandsmiðum, hófst í vikunni og stendur yfir næstu fjórar vikunnar. Fjögur skip taka þátt í verkefninu að þessu sinni; togararnir Ljósafell SU og Jón Vídalín VE og rannsóknaskipin Árni Friðriksson og Bjarni Sæmundsson, samkvæmt frétt Hafró.

Þar segir að alls verði togað á um sex hundruð stöðvum vítt og breitt á landgrunninu á 20-500 metra dýpi. Vorrallið hefur verið framkvæmt með sambærilegum hætti á hverju ári síðan 1985 og nú er þetta þrítugasta rallið.

„Helstu markmið eru að fylgjast með breytingum á stofnstærðum, aldurssamsetningu, fæðu, ástandi og útbreiðslu helstu fisktegunda við landið, og hitastigi sjávar. Einnig er safnað sýnum vegna ýmissa rannsókna, t.d. á mengandi efnum í sjávarfangi. Helmingur togstöðva var í upphafi staðsettur af reyndum skipstjórum en öðrum stöðvum var dreift um miðin með tilviljunarkenndum hætti. Undanfarin ár hafa skipstjórar einnig sett út aukastöðvar þar sem von er um þorsk í útköntum, aðallega fyrir norðvestan og norðaustan land. Úrvinnsla mælinganna og aldursgreiningar fara fram í lok mars og helstu niðurstöður verða kynntar í apríl,“ segir í frétt Hafró.

Fylgjast má með ferðum rallskipanna hér.