Bjórhátíð Kex haldin í þriðja sinn

Fjögurra daga bjórhátíð Kex Hostels við Skúlagötu hefst í dag með kynningum sex örbrugghúsa frá Danmörku og Bandaríkjunum. Þar á meðal eru danski bjórframleiðandann Mikkeller og bandarísku brugghúsin Rouge Ales og Logsdon Farmhouse Ales.

„Á morgun verðum við svo með ráðstefnu um bjór sem byrjar um þrjúleytið þar sem menn frá bæði íslensku og erlendu brugghúsunum munu koma til með að ræða framleiðslu sína og þeirra sýn á bjórinn og svo verða fleiri skemmtilegir fyrirlesarar,“ segir Ólafur Ágústsson, veitingastjóri Kex Hostels.

Ólafur og nokkrir aðrir starfsmenn Kex Hostels heimsóttu í janúar örbrugghúsið Gigantic Brewing í Portland í Oregon-ríki í Bandaríkjunum en starfsmenn þess taka þátt í hátíðinni.

„Við leggjum mikið upp úr því að fá útlendinga til okkar, stóru brugghúsin, svo þau fái að kynnast Íslendingum og aðstoða okkur við að hafa bjórinn í hávegum, á þeim stalli sem hann á skilið að vera á,“ segir Ólafur.