Garðbæingar greiddu nífaldan auðlegðarskatt Álftnesinga

Íbúar Skorradalshrepps greiða mestan auðlegðarskatt á hvern íbúa. Að meðaltali greiddi hver íbúi hreppsins 129.232 krónur í ríkissjóð í auðlegðar- og viðbótarauðlegðarskatt árið 2012. Þetta kemur fram í svari fjármálaráðherra við fyrirspurn Óla Björns Kárasonar, varaþingmanns Sjálfstæðisflokksins.

Mjög mikill munur er á hversu mikið sveitarfélögin fá greitt í auðlegðarskatt á hvern íbúa að meðaltali.

Í Reykhólahreppi, Tálknafjarðahreppi, Súðavíkurhreppi, Árneshreppi, Bæjarhreppi, Arnarneshreppi, Hörgárbyggð, Skútustaðahreppi, Fljótsdalshreppi og Breiðdalshreppi er enginn auðlegðarskattur greiddur. Það þýðir að enginn íbúa í þessum hreppum á meira en 75 milljónir í hreina eign.

Reykvíkingar greiddu að meðaltali 32.801 krónu í auðlegðarskatt. Í Garðabæ greiddi hver íbúi að meðaltali 95.239 krónur en hver íbúi Álftaness einungis um 10.000 krónur. Það er lægsta meðaltal sveitarfélaganna á höfuðborgarsvæðinu. Sveitarfélögin hafa í dag verið sameinuð.