Schumacher að komast til með­vitundar?

Umboðsmaður Michael Schumacher segir að ökuþórinn sé nú farinn að sýna merki þess að hann sé að komast aftur til meðvitundar.

Þetta eru ein bestu tíðindin sem hafa borist af heilsufari Schumacher, sem er 45 ára gamall, síðan hann lenti í alvarlegu skíðaslysi í lok desembermánaðar.

Hann fékk alvarlega höfuðáverka og gekkst undir tvær aðgerðir til að létta þrýsting á heilanum eftir miklar blæðingar.

Sabine Kehm, umboðsmaður Schumacher, sendi tilkynningu til fjölmiðla í morgun þar sem fram kom að ökuþórinn væri að sýna framfarir. Það væru augnablik þar sem hann sýndi að hann væri að ná meðvitund og mögulega vakna úr dái sínu.

Schumacher dvelur á sjúkrahúsi í Frakklandi þar sem læknar hafa síðustu vikur unnið að því að koma Schumacher aftur til meðvitundar. „Við erum enn bjartsýn,“ sagði enn fremur í yfirlýsingunni.

„Við óskum þess að því verði sýndur skilningur að við munum ekki gefa nákvæmari upplýsingar um stöðu mála. Það er nauðsynlegt til að vernda einkalíf Michaels og fjölskyldu hans og svo að læknar geti sinnt sínu starfi í friði.“