Nýtt app frá Já.is

Já.is appið er komið í loftið. Þetta er í fyrsta skipti sem upplýsingar af Já.is eru gefnar út á app-formi en þetta kemur fram í fréttatilkynningu frá Já.

Þriðjungur þeirra sem heimsækja Já.is gerir það í gegnum spjaldtölvur eða snjallsíma og mun appið bæta aðgengi þeirra notenda að upplýsingum vefjarins til muna.

Fram kemur í tilkynningunni að hönnun og framsetning upplýsinga í appinu sé bylting frá því sem Íslendingar þekkja í númeraleit.

Til að mynda taki aðeins 5-10 sekúndur að opna appið og fá þær upplýsingar sem óskað er eftir í samanburði við 30-50 sekúndur sé farið í gegnum Já.is í vafra símtækis.

Ókeypis verður að fletta upp í appinu líkt og á vefnum Já.is. Ásamt því að geta fundið upplýsingar um símanúmer er einnig hægt að hringja, senda sms skilaboð eða tölvupóst, skoða staðsetningu á korti, fá vegvísun, finna afgreiðslutíma, samfélagsmiðla og finna umsagnir um fyrirtæki í gegnum appið.

Appið virkar fyrir Android (2.3.3 og nýrri) og iPhone síma (iOS 6 eða nýrri).

Já.is tekur skýrt fram að Já.is appið kemur ekki í staðin fyrir Já Núna appið sem veitir þér upplýsingar um þann sem er að hringja áður en símtali er svarað.