Rétti tíminn til endurfjármögnunar

Fjárfestingafyrirtækið Standish Mellon Asset Management, segir að nú sé rétti tíminn til endurfjármögnunar neyðarlána AGS, Norðurlandanna og Póllands til Íslands. Þetta kemur fram í frétt Bloomberg.

Skuld Íslands vegna lánanna er 1,8 milljarður dala í heildina, eða rúmir 200 milljarðar króna. Sem samsvari um 11 prósentum af vergri landsframleiðslu. Upprunalega var lánið 6,4 milljarðar dala, eða rúmir 700 milljarðar króna.

Lánin frá AGS falla á gjalddaga á næsta ári og þar næsta, en lánin frá Norðurlöndunum á tímabilinu 2019 til 2021.

Í frétt Bloomberg segir að Ísland sé að koma upp úr kreppunni og hagvöxtur hér á landi sé hærri en í Evrópu. Þá séu stjórnvöld að vinna að því að draga úr gjaldeyrishöftunum

Greinandi hjá SMAM segir að jákvæð skilyrði á alþjóðlegum lánamörkuðum gætu gert Íslendingum kleyft að draga úr fjármagnskostnaði til lengri tíma. Hann sagði einnig að fjárfestar virtust ekki hafa áhyggjur af getu Íslands til að afnema gjaldeyrishöftin.