Aðeins tvenn viðskipti á dag

Fara þarf aftur til apríl á árinu 2012 til að sjá veltu undir 40 milljónum evra en heildarvelta í apríl nú í ár var aðeins 36 milljónir evra, sem jafngilda 5,6 milljörðum króna.

Í samanburði var heildarveltan í mars 110 milljónir evra eða 17,2 milljarðar króna í mars og 145 milljónir evra eða 22,6 ­milljarðar króna í febrúar. Hagfræðideild Landsbankans greinir frá þessu í Hagsjá.

Krónan stóð næstum óbreytt í aprílmánuði, evran kostaði 155,7 krónur í lok apríl samanborið við 155,3 í lok mars. Gengið hélt sér á nokkuð þröngu bili í mánuðinum.

Af sautján viðskiptadögum voru níu þar sem minnst ein viðskipti áttu sér stað en átta þar sem engin viðskipti fóru fram. Að meðaltali áttu tvenn viðskipti sér stað á dag, en ein viðskipti á millibankamarkaði eru að jafnaði ein milljón evra.

Seðlabankinn keypti einungis þrjár milljónir evra eða 0,4 milljarða króna í mánuðinum. Ekkert gjaldeyrisútboð var í apríl en næsta útboð er fyrirhugað miðvikudaginn 14. maí næstkomandi.