Undirbúa 2500 fermetra gagnaver í Reykjanesbæ

Advania undirbýr nú byggingu 2500 fermetra gagnavers á Fitjum í Reykjanesbæ. Þegar rekur Advania gagnaver í Hafnarfirði, en rekstur þess mun haldast óbreyttur. Vöxtur hefur verið í gagnaversþjónustu fyrirtækisins en Advania tók við gagnaverinu Thor í Hafnarfirði í lok árs 2011. Fréttablaðið greindi fyrst frá málinu í mars.

Eyjólfur Magnús Kristinsson, framkvæmdastjóri Rekstrarlausna Advania segir undirbúning þegar hafinn og ef vel gengur með framkvæmdir og öflun viðskiptavina muni fyrsti áfangi verða tekinn í notkun í ár. Þá segir hann Fitjar hentugt svæði fyrir gagnaversstarfsemi og segir gott aðgengi að orku.

„Fyrir okkur sem reka gagnaver skiptir mestu máli að hafa gott aðgengi að orku og svölu lofti sem hjálpar til við að kæla tölvubúnað á umhverfisvænan og hagkvæman hátt,“ segir Eyjólfur.

Nú nýta um 80 alþjóðlegir aðilar þjónustu gagnavers Advania og er stærsti einstaki viðskiptavinurinn Opera Software, en um 230 milljón viðskiptavina fyrirtækisins fara í gegnum búnaðinn sem hýstur er í gagnaveri Advania.

„Það er orðið forgangsmál hjá fyrirtækjum og stofnunum um allan heim að draga úr útblæstri gróðurhúsaloftegunda í sinni upplýsingatækni. Við getum boðið græna orku og fyrirsjáanlegan orkukostnað til langs tíma. Fyrir viðskiptavini okkar þýðir þessi stækkun aukna möguleika á að hagnýta svokölluð tölvuský þar sem hýsa má gögn, hugbúnað og tölvuumhverfi,“ segir Gestur G. Gestsson, forstjóri Advania.

Þá segir hann ávinning viðskipavina felast í öruggum, hagkvæmum og sveigjanlegum tölvurekstri sem knúinn sé með grænni orku,

Ávinningur þeirra felst í öruggum, hagkvæmum og sveigjanlegum tölvurekstri sem knúinn er með grænni orku.

„Það er einnig ánægjuefni að geta stuðlað að uppbyggingu atvinnulífsins í Reykjanesbæ með þessari framkvæmd,“segir Gestur.