Viðar viðurkenndi að hafa fiskað víti

Markaskoraranum Viðari Erni Kjartanssyni hjá Vålerenga var stillt upp við vegg eftir 3-0 sigur liðsins á Strömsgodset í gær.

Viðar skoraði tvö mörk í leiknum. Annað kom úr víti sem hann fiskaði sjálfur. Hann var spurður út í atvikið eftir leikinn og fékk að horfa á það hjá sjónvarpsmanni TV2.

"Kannski féll ég of auðveldlega þarna. Ég get viðurkennt það. Ég og dómarinn vorum samt á því að þetta væri víti. Eg féll samt of auðveldlega. Það er klárt," sagði Viðar Örn eftir leikinn en hann lenti einnig í því hér heima síðasta sumar að vera sakaður um leikaraskap.

"Ég var að leita eftir snertingunni og það sést vel. Ef þetta hefði átt sér stað fyrir utan teiginn þá hefði verið dæmd aukaspyrna og ekkert vesen. Þetta hafði samt ekki áhrif á úrslit leiksins. Við vorum mun betri."

Hér má sjá atvikið umdeilda og viðtalið við Viðar Örn.