Fyrstu laxarnir eru mættir í Elliðaárnar

Það er alltaf beðið með eftirvæntingu eftir fyrstu löxunum sem mæta í Elliðaárnar og við getum staðfest að hann er mættur þetta sumarið nokkuð á undan áætlun.

Við fengum staðfest frá Kjartani Inga Lorange hjá Veiðihúsinu að hann sá bjarta nýgengna laxa á Breiðunni og Ásgeir Heiðar leiðsögumaður staðfesti við hann áðan að hann hefði líka sé laxa stökkva á þessum þekkta veiðistað.  Elliðaárnar opna ekki fyrr en eftir tvær vikur svo það er alveg mögulegt, verði nokkuð regluleg ganga af þessum snemmgengnu löxum, að veiðivon verði víða í ánni við opnun þó svo að mesta spennan sé alltaf mest í kringum fyrstu köstin í Sjávarfoss.  Eftir líflega opnun í Norðurá þar sem fimm laxar eru staðfestir á land, og nokkuð fleiri en það hafa sloppið, virðist sem laxinn komi bæði vel haldin og nokkuð á undan tíma í árnar.  Þetta gæti verið einhver vísbending um að ástand sjávar hafi verið laxinum hagstætt og það megi búast við góðu veiðisumri í ár eins og í fyrra.  Verði það raunin að gott veiðisumar sé í vændum er ekki seinna vænna að tryggja sér leyfi því samkvæmt fréttum frá veiðileyfasölum landsins er salan mun betri núna en í fyrra.  Það er þess vegna ekki mikið eftir af leyfum og það lítur út fyrir að það verði uppselt í flestar bestu árnar.