Landsbankinn selur 9,9% hlut í Framtakssjóði Íslands

Landsbankinn hefur selt 9,9% eignarhlut FSÍ (Framtakssjóði Íslands) slhf. og allan eignarhlut sinn í IEI slhf., eða sem nemur 27,6% en í árslok 2013 var FSÍ skipt upp í tvö félög FSÍ slhf. og IEI slhf.

Heildarsöluandvirðið er rúmlega 7 milljarðar króna og eru kaupendur í hópi núverandi hluthafa FSÍ og IEI en hluthöfum í fyrrgreindum félögum voru boðnir hlutirnir til kaups í samræmi við samkomulag þess efnis.

Landsbankinn var fyrir viðskiptin stærsti hluthafi beggja félaganna með 27,6% eignarhlut í hvoru þeirra, en er að þeim loknum annar stærsti hluthafinn í FSÍ með 17,7% eignarhlut. Landsbankinn á að sölunni lokinni ekki hlut í IEI slhf.

Landsbankinn mun bókfæra samtals 4,9 milljarða hagnað á öðrum ársfjórðungi vegna viðskiptanna og gangvirðisbreytinga á þeim hlut sem bankinn heldur eftir.

„Stefna Landsbankans er að selja þær eignir í óskyldum rekstri sem bankinn kann að eignast og hefur mikill árangur náðst á því sviði á undanförnum árum. Landsbankinn seldi eignarhaldsfélagið Vestia til Framtakssjóðsins árið 2010 og eignaðist við það um 27,6% í félaginu. Sú ráðstöfun hefur skilað bankanum miklum ávinningi og FSÍ hefur gegnt mjög mikilvægu hlutverki í endurreisn íslensks atvinnulífs. Salan nú mun styrkja stöðu bankans, bæði til skemmri og lengri tíma“, segir Steinþór Pálsson, bankastjóri Landsbankans.