Gagnrýnir ákvörðun Seðlabankans um að herða gjaldeyrishöftin

„Þessi ákvörðun Seðlabankans er klárlega að snerta mörg hundruð aðila og þá bæði fjölskyldur og börn. Mér finnst bankinn vera með þessu að herða gjaldeyris­höftin,“ segir Sæmundur St. Magnússon, framkvæmdastjóri Allra ráðgjafar.

Fyrirtækið hefur milligöngu um söfnun sparnaðar ­erlendis með samningum við erlendu tryggingafélögin Friends Provident og Bayern. Seðlabankinn telur, eins og komið hefur fram, að slíkir samningar brjóti lög um gjaldeyrismál þar sem þeir feli í sér óheimilaðan sparnað eða söfnun erlendis. Bankinn hefur því gefið út nýjar reglur um gjaldeyrismál sem taka gildi í dag.

„Það er forkastanlegt að svona frétt sé lekið í fjölmiðla áður en aðilar sem eru starfandi á ­þessum markaði fá að vita um ákvörðunina,“ segir Sæmundur.

„Ég talaði við lögfræðing okkar í gær og hann sagðist ekki vita til þess að slík vinnubrögð hefðu verið framkvæmd áður í stjórnsýslunni.“

Sæmundur segir það koma fram í umsókn fyrirtækisins til Fjármálaeftirlitsins, um starfsleyfi til vátryggingamiðlunar, að fyrirtækið miðli til erlendu tryggingafélaganna.

„Við sóttum um leyfi til að gera þetta fyrir rétt rúmum ­tveimur árum og þeir gefa það. Hvað hefur þá verið óljóst í þessu?“